DÍA CONTRA A VIOLENCIA DE XÉNERO

violenc-xenero-16

Desde 1981 Latinoamérica, e o resto do mundo, conmemora cada 25 de novembro o día contra a violencia de xénero. Os movementos feministas da rexión, cunha das taxas máis altas de violencia contra a muller, acuñaron esa data en honra ás dominicanas Minerva, Patria e María Teresa Mirabal, tres irmás asasinadas o 25 de novembro de 1960 por orde do ditador Rafael Leónidas Trujillo, do que eran opositoras. Anos máis tarde, en 1999, a ONU sumouse á xornada reivindicativa e declarou cada 25 de novembro Día Internacional para a Eliminación da Violencia contra a Muller, en honra ás irmás Mirabal.

O Equipo da Biblioteca do IES Lucus Augusti quere concienciar a toda a comunidade educativa sobre esta lacra mediante mensaxes visuais a través de siluetas. Aquí témo-lo vídeo de todo o exposto polo centro adiante.

E se queres ve-las fotos, preme  aquí .

25 de novembro III-A nosa flashmob

A campaña “1 000 millóns en pé” preséntase como a acción de masas máis grande da historia da humanidade para acadar o remate da violencia contra a muller.

Comezou en 2012, no día de San Valentín, e coma unha 1 billionchamada de atención diante do feito de que, estatísticamente, 1 de cada 3 mulleres no planeta sufrirían durante a súa vida algún tipo de violencia física ou sexual. Se a poboación mundial é de 7 000 millóns de pesoas, aproximadamente, isto indicaría que o número total de vítimas chegaría a uns 1 000 millóns de mulleres e rapazas. De aí vén o nome da campaña. Cada mes de febreiro, por todo o mundo, moreas de mulleres póñense en pe, cantan e bailan para demostrar que a alegría é máis forte e poderosa que a violencia. Podes ter máis información, premendo sobre a imaxe.

Neste ano, e nestes días, nos que a violencia de xénero continúa a golpear, pareceunos importante, especialmente dende o ámbito educativo, empregar esa campaña para contribuír co noso apoio.

Así, o pasado 25 de novembro, realizouse unha flashmob na que se cantou e bailou “Break the chain“. Unha peza escrita e producida por Tena Clark, con música da propia Tena e Tim Heintz e coreografía de Debbie Allen.  De seguido tedes o resultado.

25 novembro-II

Dende aquí querémonos facer partícipes da acción de EnlazaVigo, organizada polo Consello Municipal da Muller. Así, preténdese que a cidadanía se poña na vangarda da campaña contra a violencia de xénero e se impliquen tamén os centros de ensino. Este ano contaron coa participación de 43 centros e case 2 000 estudantes. Todo un éxito. Dende aquí, un agarimoso recordo pola iniciativa.

violencia_de_xenero

Tamén editaron un dossier, para traballar na aula, que se pode descargar aquí. Se queres máis información sobre o acto, ou ver as fotos, podes premer na ligazón de EnlazaVigo do principio.

25 de novembro

De novo, coma tódolos anos temos aquí un feixe de recursos cos que se poden tratar a lacra da violencia de xénero. Coma en anos anteriores, contamos coa axuda de Obed (2º BAC) que realizou o cartel co que se abre a exposición que temos no vestíbulo e da que iremos informando nos vindeiros días.

25 novembro

Neste ano está prevista unha “flasmob” no vestíbulo e unha exposición de diferentes recursos como son a listaxe de vítimas de violencia de xénero do presente ano, a exposición de cartaces da revista “Rapazas“, coa que se ten traballado noutros anos. Nesta ocasión a autora permitiunos a impresión en gran tamaño dos cartaces con temática específica: que é a violencia de xénero, a violencia no noivado e a detección das primeiras condutas de maltrato e as relacións de dominio. Finalmente, contraponse o que sería unha conduta sana.

Para rematar, temos un vídeo e os cartaces correspondentes, tamén no vestíbulo, sobre as “irmás Marabal“, no que se fai unha pequena indicación de por que esta data, o 25 de novembro, é tamén no seu honor. Aquí tedes o vídeo.

“25 de novembro”. Fin da exposición.

O vindeiro venres día 5 rematará a exposición en conmemoración do 25 de novembro. Foi moito o traballo e tamén os días de exposición e proveito que se tirou dela. Pero agora, para rematar, presentamos o vídeo que pecha tódalas actividades realizadas.

Aparece no vídeo todo un resumo das actividades realizadas nestes días. Por exemplo, a tea que une solidariedade e apoio contra o maltrato, e que se podía ver no teito do vestíbulo (aquí pódese ver un carrusel con parte do proceso de entretecido e colocación). Tranqui. Tarda un pouquiño en cargar, pero carga.

This slideshow requires JavaScript.

Mención a parte merece a colaxe en lenzo realizada, expresamente para a exposición, por Obed –un noso alumno de 1º de BAC– que serviu como cartel anunciador da exposición, que se pode ver a continuación.Obed-lenzo

Tamén hai que mencionar a escolma das láminas da presentación publicada en días anteriores e das mensaxes colocadas por toda a exposición. Ou as fotos que tiramos do libro de Gervasio Sánchez, “Mujeres women: Afganistán” e que empregamos para amosar e complementar a situación da muller noutras áreas xeográficas, neste caso adicado a Afganistán.

Esperamos que vos preste o vídeo. Sen pecar de falsa humildade, coidamos que Demetrio realizou un bo traballo con el. Velaí o tedes.

O maltrato nin en pintura

Con este título, presentamos este ano a conmemoración do “Día Internacional contra a violencia de xénero“. Entre o material ofrecido está un vídeo que fai referencia á exposición do vestíbulo titulada “O maltrato nin en pintura“.

En principio, estes recursos serían válidos para calquera nivel tanto da ESO como de BAC. O método que se propón para traballar na aula, consistiría en que os grupos pasaran a ver as láminas e escribiran no seu caderno o que lles suxiere cada unha das obras. Posteriormente, pódese realizar un debate entre o que escribiron e interpretaron e os pequenos comentarios de cada lámina que aparecen no guión posterior. O profesor ou profesora, dependendo do grupo e da súas conclusións, poderán moderar o debate no sentido que estimen como máis axeitado.

  • Contamos co vídeo do expositor coas láminas de arte:
  • E co guión con comentarios curtiños explicando o sentido das láminas dende o punto de vista artístico e cultural (para descargalo, preme na imaxe):

Que ves-imaxe

  • Aqui temos a versión extendida do mesmo vídeo coas láminas de pintura, mais tamén se lle engadiron frases e viñetas actuais:

 A maiores, en niveis superiores, tanto 2ºciclo da ESO como en BAC, pódese traballar sobre materiais máis específicos e que esixen unha maior capacidade de reflexión. Así, ofrécese un 2º guión, no que nunha listaxe se recollen tódalas vítimas do ano 2013, cun pequeno comentario das circunstancias do feito. Hai tamén un mapa por provincias no que se pode puntuar os lugares, e unha táboa de datos no que se indican a distribución por comunidades autónomas e unha gráfica na que aparecen reflectidas as vítimas anuais dende 1999 até o 2013 (para descargalo, preme na imaxe):

Gráfica vítimas

Finalmente, dúas ligazóns de onde se tirou gran parte da información e que se poden empregar para facer unha análise máis ampla:

Morreu Adela Mirabal

En varias ocasión amosamos neste blogue entradas nas que se conmemoraba, no noso Centro, o “Día Internacional para a eliminación da violencia contra a muller“. Esa conmemoración converteuse en oficial pola ONU a partir de 1999. Así a partir dunha proposta da República Dominicana que contara co apoio inicial de 60 países, tódolos 25 de novembro, esa data que xa dende anos antes se celebraba en moitos países latinoamericanos pasa a ser unha data global. O motivo, xa o sabemos é unha homenaxe a 3 das Irmás Mirabal, que foran torturadas e asasinadas durante a ditadura de Leónidas Trujillo no país caribeño.

Comentamos o anterior porque o pasado día 1, morreu a última -a cuarta- das irmás Marabal, Bélgica Adela “Dedé” Mirabal. Así, o notifica un dos principais periódicos dominicanos “El día“, e faise eco da repercusión, que tivo no país, o suceso. A importancia das Mirabal para a República Dominicana é tan grande que xa apareceu, inmediatamente, unha pequena información na principal folla educativa do país (educando.edu.do) para que se traballe co alumnado e se lembre o seu exemplo de resistencia fronte ao ditador.

Aquí, pódese ver un pequeno documental duns 10 minutos no que se comenta a historia das “Tres mariposas” -así eran chamadas polos dominicanos- e o respeto que inspiran nos cidadáns dominicanos.,

A “performance”.

Para conmemorar a data do Día Internacional contra a Violencia de Xénero” no Centro, organizado polo Departamento de Orientación e co apoio de profes varios, como Luisa, e da Biblioteca, levouse a cabo unha “performance“, é dicir unha representación simbólica na que aparecían ciscadas polo vestíbulo as típicas frase machistas que, seguro, máis dunha vez temos oído. Como parte da representación, un grupo de alumnos e alumnas arrincaron os murais que contiñas esas frases ferintes, e enarbolaron carteis con frases que sanan e axudan. Finalmente, os globos que caían do piso superior crearon un ambiente festivo. Aquí temos o vídeo que resume o acto.

25 de novembro: “Día Internacional contra a Violencia de Xénero”

Para conmemorar este día, a Comunidade Educativa do IES Lucus Augusti coa fin de contribuír á concienciación de todos e todas a través da educación, levará a cabo as seguintes actividades:

  • Cartel que preside tódolos actos, no que o debuxo central foi realizado por un alumno do Centro.
  • Traballarase nas clases con materiais do libro de Francesco Tonucci, “Con ojos de niña”. Elaboraranse escritos, manifestos, alegatos etc., que serán exhibidos na clase e no vestíbulo o día 25. Aquí tedes un vídeo que podedes empregar para que sirva de aperitivo do libro.

 

  • O alumnado da ESO, traballará sobre frases machistas que fan DANO, MAL, FIREN e proporá frases que fagan BEN e CUREN.
  • Charla sobre Violencia de xénero nas clases de 1º da ESO.
  • O día 25 de novembro, durante o lecer, realizarase unha “performance” onde se destruirán as frases que danan e ergueranse as frases positivas.
  • Finalmente, este video realizado por alumnos de PDC.